接近12時,一位婆婆撑着柺仗,與女兒一同走進診症室。這是記憶科門診,今天病友不算
太多,大堂並不擁擠。
「婆婆你好,最近你啲記性點呀?」我未待她坐下先來打個招呼。
「哈哈,記性就嘛嘛地啦。」婆婆笑容滿面,似乎心情不錯。
「咁記唔到啲乜嘢呢?」我追問。
「都無乜嘢記嘅,成日係屋企啫,哈哈。」很多時候,老友記都申訴自己記性不好,但問
他們是什麼問題卻說不出來。
「仲有無發脾氣?」我轉身問女兒。
認知障礙|常見精神行為症狀(BPSD)
根據記錄,婆婆今年72歲,與丈夫同住,有中期認知障礙問題。女兒上次要求提早覆診,
因為覺得她突然變得暴燥。覆診時婆婆被處方了藥物,並安排兩個月後再見醫生。
「好似好咗啲,少咗鬧人喎。」女兒報告。
「情緒和行為問題,是認知障礙患者常見症狀,我們稱為BPSD(behavioral and
psychological symptoms of dementia),患者可能變得暴燥、易怒,又或情緒低落,
甚至有妄想和幻覺。
「咁上次覆診到宜家,有幾多次發脾氣?」我嘗試量化藥物對問題的幫助。
「咁呀。。。」女兒在仔細地想着:「兩次囉。最勁個次係中秋節個日,同佢老公拗哂
交,仲掟嘢添呀。」
「嘩,做乜事咁嚴重嘅?發生乜事?」要知道前因後果,才能對症下藥。
「唉,佢同老公鬧足幾十年交㗎啦,鬧完又無嘢,一陣間又鬧過。。。」女兒交代。
「咁為乜事鬧交嘅?你都明白,有時發脾氣鬧交都可以係正常,未必係因為認知障礙問題
嘅。」
「其實係咁嘅,呀爸日日落街買粥番嚟俾佢做早餐,個日佢買咗麥記,咁呀媽講咗句
『嘩!估你唔到喎』,呀爸就開火話佢做乜都唔啱啦咁,鬧鬧吓就掟埋嘢收唔到科
啦。。。」女兒說起來有點尷尬。
有時別人一句簡單的說話,本來言者無心,但聽者有意,作出無限聯想,以為是對自己的
一種攻擊,固此作出旁人看來不大合理的反應。
「咁婆婆個句估你唔到,可能真係無乜惡意,不過老公反應大咗勞氣起嚟,婆婆跟住又控
制唔到同佢鬧過。。。似乎係大家相處控制情緒問題?」
兩公婆吵吵鬧鬧,真是常見極了!通常對着最親的人,態度就越毫無顧忌。或許與認知障
礙,並無直接關係。我怎樣加大藥物,也解決不了當前問題。
「可能係啦。。。」女兒對我說。
婆婆坐在一旁笑着,沒有回應,也沒有反駁,不知道是不明白我們討論什麼,還是默默贊成
我們所說的。
「不如我轉介你地去臨床心理學家傾吓呀,有時大家都睇吓點面對情緒點相處都可能幫到
手㗎。」
幾十年夫婦,現在才來學習如何相處,聽起來好像有點匪夷所思。但若能由專業人士的旁
人作個提點,又確有機會作出一些改變,試試亦未嘗不可。而現實是,情緒輔導和家庭輔
導一向是有其效用。
「咁呀,都好啦。唉,我覺得其實老豆照顧呀媽好大壓力。成日要睇實同跟出跟入其實都
幾辛苦。」女兒有點苦惱。
認知障礙|多關懷患者心理需要
要全天候照顧另一個人,還要是記性不是太好,自理可能會出亂子,甚至有時可能會暴躁
起來的,當然是並不容易,壓力也可想而知。
「明白呀,咁見臨床心理學家時傾埋點處理都好呀。嗱,如果有需要,有啲機構都幫到你
地㗎。。。」我轉身拿出小册子。
從來當照顧者都並不容易。除了處理記性等認知問題,和實務上生活的安排,患者的心理
亦要關注,相處時的互動應對,又要花點心思。所以當出現問題,一定要尋求幫忙!醫護
人員會在你旁邊盡力協助。
「註:以上圖片為示意圖,非當事人
資料來源: Dr. S 公院老人專科醫生
原文:  LINK

推介產品

Author: Admin

HKHL